Helmut Jenč✝, Anja Pohončowa, Jana Šołćina

Němsko-hornjoserbski słownik noweje leksiki

W lěće 2006 wudachu Helmut Jenč✝, Anja Pohončowa a Jana Šołćina „Němsko-hornjoserbski słownik noweje leksiki“, kotryž nawjaza na dwuzwjazkowy „Němsko-hornjoserbski słownik“ z lětow 1989/91 a jón w mjeńšim wobjimje z něhdźe 12000 němskimi hesłami rozšěri. Słowoskład hornjoserbskeje spisowneje rěče bě so po politiskim přewróće 1989/90 sylnje přeměnił a rozšěrił. Słownik měješe spjelnić žadanje za spušćomnym informaciskim srědkom k nowej leksice a z tym přinošować k powyšenju rěčneje kultury.

Z natwarom a rozšěrjenjom digitalnych poskitkow Serbskeho instituta w zašłych lětach zrodźi so ideja, tež słownik noweje leksiki na rěčnym portalu hornjoserbsce.de wozjewić. Prěnja, trochu wobdźěłana wersija wozjewi so w decembru 2023. Paralelnje dźěłaše so na druhim, wobdźěłanym nakładźe, kotryž w februaru 2025 w Ludowym nakładnistwje Domowina pod lektoratom Michała Nuka wuńdźe.

Hladajo na paralelny přihot wobšěrneho němsko-hornjoserbskeho słownika (prěni modul terminologije je so 2023 online wozjewił), stej so awtorce při rozšěrjenju słownika noweje leksiki na material z rěčnych kućikow a interneje lisćiny nowotwórbow wobmjezowałoj. Konsekwentnje dodawali su so pak falowace žónske formy za powołanske pomjenowanja.