Zdobom

W powěsći wo jubileju sym njedawno čitała sćěhowacu sadu: „Mjez gratulantami běchu dźěći wjesneje pěstowarnje, zbožo wupřałoj stej zdobom Christina Kubašowa a Jadwiga Wroblec.“ To so mi wěrić njecha, zo su woni to wšitcy zdobom činili. Skerje tukam na to, zo stej mjenowanej žonje jubilarej tež zbožo wupřałoj. Wězo ma słowo zdobom podobny woznam kaž tež, signalizuje, zo płaći někajka informacija za wjacore wosoby abo situacije, tola přidatnje mamy w nim wěstu časowu informaciju – dźe wo stawy abo činitosće, kiž wotměwaja so w samsnym času, w słowje zdobom tči słowo doba. A tohodla njehodźi so kóžde tež narunać ze zdobom: Hanka chodźi na gymnazij – Marka tam klětu tež (a nic zdobom) póńdźe. Hdyž runje naliwaš, nalij mi tola prošu tež šalku kofeja (nic zdobom). Wuměnić móžemy zdobom a tež w tajkich sadach kaž: Wón je naš wučer a zdobom/tež nawoda šulskeho chóra – hdyž je potajkim runočasnosć data. Tutoho woznama runočasnosće dla je zdobom dobry hornjoserbski wotpowědnik za němske „gleichzeitig“. Hakle w nowšim času wužiwa so za to słowo runočasnje, štož je wězo kalka, to rěka přełožk z němčiny.

S. Wölkowa

temy: słowa podobne po woznamje abo formje

klučowe słowa: adwerb

hesła: zdobom, gleichzeitig, tež