Witajće k nam!

Rěčespytny wotrjad Serbskeho instituta prezentuje Wam tu zběrku rěčnokulturnych přinoškow, kotrež wozjewjeja Budyske rěčespytnicy (Anja Pohončowa, Leńka Šołćic, Jana Šołćina) kaž tež něhdyša kolegina Sonja Wölkowa wot lěta 2002 prawidłownje w serbskim programje MDR pod rubriku „Rěčny kućik“. Na tajke wašnje nastawa wob lěto něhdźe 50 přinoškow. Mjeztym je so nahromadźiła nahladna hromadka bóle praktiskich hač teoretiskich rozmyslowanjow wo najwšelakorišich prašenjach moderneje hornjoserbšćiny, kotrež na tutej internetnej stronje zjawnosći spřistupnjamy. W nich zmóžnjamy z pomocu pytanskich funkcijow rešeršowanje za konkretnymi přikładami abo temami. Wjace informacijow wo zaměrje tutych přinoškow namakaće tu.