Zamołwjenka

„Sym swojej dźowce zamołwjenku za šulu napisała“ powědaše njedawno kolegowka we wólnej rozmołwje na dźěle. „Zamołwjenku“? – tute słowo hnydom mój zajim zbudźi, dokelž je dotal njeznajach. Tuž so wězo woprašach. Měnjena bě wona skerje mjeńša cedlka za wučerku, kotruž bě mać swojej dźowce sobu dała, ně. „Entschuldigungszettel“. A wona hnydom doda: „Ale horjeka na cedlce sym wězo zamołwjenje napisała!“. Je to rjany přikład za to, zo nastawaja kreatiwne serbske nowotwórby hustodosć w rěčnej praksy. W dwurěčnych słownikach wuraz „zamołwjenka“ dotal zapisany njeje. Tam namakamy wotwodźenki podobneho typa, kaž na přikład słowa „dopomnjenka“, „wopomnjenka“ abo „přispomnjenka“. Z wonej zamołwjenku bě tuž měnjeny pisomny dokład, z pomocu kotrejež bě mać wo zamołwjenje dźowki chorosće dla prosyła. Tuž wonu rjanu nowotwórbu hnydom do lisćiny noweje leksiki zapisam!

J. Šołćina

Themen: Sorbische Entsprechungen für deutsche Wörter

Schlüsselwörter: Substantiv, Verbalsubstantiv, Ableitung

Wörter: zamołwjenka, Entschuldigungszettel, -ka