Weichmacher

Před wěstym časom sym so w rěčnym kućiku zaběrała z wurazom krydojte abo krydowe zuby. Tehdy sym prajiła, zo hišće za přičinami tutoho fenomena pola dźěći pytaja. Mjeztym su slědźerjo drje krok dale. Tak su zwěsćili, zo njeje špatne zežiwjenje a špatne hladanje zubow hłowna přičina, ale zo tohorunja antibiotika k nastawanju krydowych zubow přinošuja kaž tež wěste škódne maćizny, wosebje tak mjenowane zmjechčowaki. Zmjechčowaki abo zmjechčaki, němsce „Weichmacher“, namakamy we wjele hrajkach, ale tež w meblach a wšelakich chemikalijach, kiž doma za rjedźenje wužiwamy. Serbski wotpowědnik zmjechčowak njeje žana nowa wunamakanka, ale wužiwa so hižo wjele lět, wosebje we wučbje, a to w předmjeće chemija. Tež w dwuzwjazkowym słowniku z lěta 1989/91 je tutón wuraz w samsnym woznamje zapisany. Nowe tež njeje, zo su zmjechčowaki jara škódne, wosebje w hrajkach, kiž dźěći rady do huby bjeru. Prašam so tuž, čehodla je přeco hišće dowolene, tajke zmjechčowaki abo zmjechčaki za produkowanje hrajkow wužiwać.

A. Pohončowa

Themen: Sorbische Entsprechungen für deutsche Wörter, Sinnverwandte und ähnliche Wörter

Schlüsselwörter: Substantiv, Ableitung

Wörter: Weichmacher, zmjechčowak, zmjechčak