Waldbrandgefahrenstufe

Wosebje nětko w lěćnym času abo po dołhej suchoće stupa strach lěsnych wohenjow. Hišće před někotrymi lětami su so potom postajili wšelake „Waldbrandwarnstufen“, serbsce běchu to warnowanske schodźenki k zadźěwanju lěsneho wohenja abo krótšo warnowanske schodźenki lěsneho wohenja. W němskej běrokratiji mjenuja je nětko „Waldbrandgefahrenstufen“. A serbsce? Hdyž chcemy zwuraznić, zo wobsteji wotnětka „Waldbrandgefahrenstufe 4“, prajimy k tomu serbsce strach lěsneho wohenja 4. schodźenka abo 4. stopnja, potajkim: W Sakskej su postajili resp. wuwołali strach lěsneho wohenja 4. schodźenka. W tutym zwisku chcu pokazać na dalši terminus. Tak rozeznawaja so w Sakskej tři tak mjenowane „Waldbrandgefahrenklassen“. To su kónčiny z wysokim, srjedźnym abo niskim strachom lěsnych wohenjow. Serbsce móžemy je mjenować klasy abo kategorije stracha lěsnych wohenjow. Južny dźěl Budyskeho wokrjesa přisłuša na přikład nastupajo strach lěsnych wohenjow klasy abo kategoriji B, ale sewjerny dźěl klasy resp. kategoriji A. Ja pak so nadźijam, zo strach lěsneho wohenja hižo njewobsteji.

A. Pohončowa

temy: serbske wotpowědniki za němske słowa

klučowe słowa: substantiw

hesła: Waldbrandgefahrenstufe, Waldbrand, Warnstufe, lěsny woheń