Selbstanzeige

W zwisku ze sudniskim procesom něhdyšeho prezidenta koparskeho zwjazka FC Bayerska Mnichow jewješe so husćišo wuraz „Selbstanzeige“. W Serbskich Nowinach čitach za to sebjedenunciacija. Tež w němskich nowinach wužiwa so zdźěla město „sich selbst anzeigen“ „sich selbst denunzieren“. Werb denuncěrować ma dźensa negatiwny abo samo wothódnoćacy přisłód. Rěka to, zo něchtó někoho druheho z moralisce niskich motiwow pola policije wozjewi. W času diktaturow su knježićeljo ludźi zdźěla namołwjeli, zo bychu přiwuznych, susodow abo cuzych hinašeho zmyslenja denuncěrowali, potajkim něhdźe oficialnje wozjewili. Wužiwać wuraz sebjedenunciacija w zmysle ‚sebjewozjewjenje‘ móže k tomu wjesć, zo so zapřijeće a woznam słowa denunciacija złahodni a naposledk hižo něchtó žane skruple wjace nima, tež druhich ludźi denuncěrować. Za němske „Selbstanzeige“ je tohodla po mojim měnjenju wuraz sebjewozjewjenje lěpši serbski wotpowědnik.

A. Pohončowa

Themen: Sorbische Entsprechungen für deutsche Wörter

Schlüsselwörter: Substantiv

Wörter: Selbstanzeige, selbst, Selbst-, sebje