Rózarije

Oktober je měsac róžowca. My smy doma přeco rózarije spěwali, nic róžowc. To pak bě naposledku to samsne. Forma rózarije pokazuje na łaćonski pochad. Rosarium woznamjenješe so we łaćonšćinje prěnjotnje róžowa zahroda abo tež róžowa girlanda – hlej němske Rosenkranz – z kotrejž je so wobraz swjateje Marije pyšił. Dźensa wužiwa so zwjetša pluralowa forma rózarije, hačrunjež eksistuje singularowa forma rozarij, kaž ju na př. Pfuhl (1866) a Kral (1931) we swojimaj słownikomaj podawataj. Pola Jakubaša (1954) móžemy hižo přidawk «meist rózarije» čitać, potajkim pluralowu formu. Völkel (1970) rozeznawa mjez pluralowej formu rózarije za paćer a singularom rozarium/rozarij za zahrodu. Hač nětko rózarije abo róžowc, maći Boža Róžeńčanska so přez woboje wjeseli.

L. Šołćic

Themen: Sorbische Entsprechungen für deutsche Wörter, Sinnverwandte und ähnliche Wörter

Schlüsselwörter: Latein, Deutsch

Wörter: rózarije, rozarium, rozarij, róžowc, Rosarium, Rosenkranz beten, rózarije spěwać