Rózarije

Oktober je měsac róžowca. My smy doma přeco rózarije spěwali, nic róžowc. To pak bě naposledku to samsne. Forma rózarije pokazuje na łaćonski pochad. Rosarium woznamjenješe so we łaćonšćinje prěnjotnje róžowa zahroda abo tež róžowa girlanda – hlej němske Rosenkranz – z kotrejž je so wobraz swjateje Marije pyšił. Dźensa wužiwa so zwjetša pluralowa forma rózarije, hačrunjež eksistuje singularowa forma rozarij, kaž ju na př. Pfuhl (1866) a Kral (1931) we swojimaj słownikomaj podawataj. Pola Jakubaša (1954) móžemy hižo přidawk «meist rózarije» čitać, potajkim pluralowu formu. Völkel (1970) rozeznawa mjez pluralowej formu rózarije za paćer a singularom rozarium/rozarij za zahrodu. Hač nětko rózarije abo róžowc, maći Boža Róžeńčanska so přez woboje wjeseli.

L. Šołćic

temy: serbske wotpowědniki za němske słowa, słowa podobne po woznamje abo formje

klučowe słowa: łaćonšćina, němčina

hesła: rózarije, rozarium, rozarij, róžowc, Rosarium, Rosenkranz beten, rózarije spěwać