Rechtsbündig a linksbündig

Při kompjuterowym layouće je mjez druhim wažne, kak zarjadujemy sej linki. Tekstowe programy poskićeja tu warianty „linksbündig, rechtsbündig, Blocksatz“ a „zentriert“. A kak serbsce? Słownik mjenuje jako wotpowědnik za „linksbündig“ wopisowanje na lěwu kromu wusměrjeny abo na lěwy bok wusměrjeny, „rechtsbündig“ je potom wotpowědnje na prawu kromu wusměrjeny – krótšo bychmy móhli rjec, zo su linki nalěwo wusměrjene resp. naprawo wusměrjene. Hdyž maja wšě linki jenak dołhe być – z jenakej lěwej a prawej kromu, rěčimy wo blokowej sadźbje, dokelž wupada tekst potom kaž blok. Hinak je, hdyž mamy nalěwo wusměrjeny tekst – tu nastanje tak mjenowany „Flattersatz“. Tutón je hižo w dwuzwjazkowym słowniku před nimale 30 lětami dóstał serbski wotpowědnik pjerchotata sadźba, štož je wězo cyle po němskim přikładźe přełožene. Wopisować móžemy tutón typ layouta jako nalěwo wusměrjeny z njerunej prawej kromu. A naposledk wostanu hišće dosrjedźa wusměrjene abo centralnje wusměrjene – centrěrowane – linki. Takle formatěrujemy husto nadpisma, tola tež w basnjach njeje tajke wašnje rědke. Widźiće, kak derje maja so rozhłosownicy, kiž swoje teksty předewšěm ertnje poskićeja – wusměrjenje linkow jim při tym hłowybolenje njenačini.

S. Wölkowa

Themen: Sorbische Entsprechungen für deutsche Wörter

Schlüsselwörter: Adjektiv, Zusammensetzung

Wörter: layout, rechtsbündig, linksbündig, Blocksatz, zentriert, nalěwo wusměrjeny, naprawo wusměrjeny, blokowa sadźba, Flattersatz, pjerchotata sadźba, sadźba, kroma, centrěrowany