Rěčne kućiki

Powabić so

Husto słyšiš abo čitaš, zo so něchtó za wukubłanske městno abo praktikum powabi. Wužiwanje werba powabić w zmysle, zo so něchtó wo wotpowědne městno zamołwja resp. požada abo tež přizjewi, je nowše wuwiće. Motiwacija za přiběrace wužiwanje werba powabić w tutym konteksće tči drje we wliwje němčiny. W němčinje přesadźuje so dźeń a bóle wužiwanje prepozicije „für“ město „um“ w zwisku z werbom „sich bewerben“: „sich für ein Studium bewerben“ město „sich um ein Studium bewerben“. Serbšćinarjej je tute wužiwanje najskerje tak běžne, zo pyta při přełožowanju po najkrótšim puću za adekwatnej formu. Tež fonetiska bliskosć wabić, powabić k němskemu „bewerben“ drje hraje wěstu rólu za woblubowanosć tutoho noweho słowa. Ja sama bych wšak radšo wužiwała werb so přizjewić, ale nowe słowo so powabić bych bjeze wšeho akceptowała, klinči drje tež we wobchadnej rěči lěpje hač germanizm so bewerbwać. Tuž lubi připosłucharjo, přeju wam wjele wuspěcha při zamołwjenju abo požadanju wo dźěłowe městno resp. při přizjewjenju abo powabjenju za přistajenje.

A. Pohončowa

temy: serbske wotpowědniki za němske słowa

klučowe słowa: werb, němčina

hesła: bewerben sich, powabić so, požadać so, zamołwić so, powabjenje, Bewerbung