Pola Skupakec nakupować

W Budyšinje wotewri so před něšto lětami Dom na Žitnych wikach z bydlenjemi a tójšto wobchodami. Wobsedźer tutoho domu chcyše tež dwurěčne tafle připrawić dać a pytaše tuž za wotpowědnymi serbskimi pomjenowanjemi. Mjenje abo bóle žortnje namjetowachmy tež za wobchod „Mäc-Geiz“ serbske pomjenowanje, a to Pola Skupakec. Předwěšk „Mc“ abo „Mac“ namakamy we wjele ameriskich swójbnych mjenach, na přikład McGyver, MacKenzie a wězo McDonald – su to typiske swójbne mjena irskeho a šotiskeho pochada. Wobchod „Mäc-Geiz“ je znaty za swoje tunje poskitki, kiž su zawěsće wosebje za skupych ludźi myslene. W serbšćinje mamy swójbne mjena, kotrež bazuja na adjektiwach a z tym na kajkosćach čłowjeka, na přikład: Mudrak (wotwodźeny wot mudry) abo Nowak (wotwodźeny wot nowy). Po samsnym mustrje móžemy tworić mjeno Skupak, a tak nastanje serbski wotpowědnik za „Mäc-Geiz“ jako Skupakecy, Skupakec resp. Pola Skupakec. A tež hdyž chcemy radšo pola „Pfennigfuchsera“ nakupować, móžemy serbsce prajić: Pojědźemy k Skupakecom abo tež k Fenkarjecom, zo bychmy sej tam něšto za tunju płaćiznu kupili.

A. Pohončowa

Themen: Sorbische Entsprechungen für deutsche Wörter

Schlüsselwörter: Eigenname

Wörter: MäcGeiz, skupy, Skupakec, Pfennigfuchser, Fenkarjec