Rěčne kućiki

Pjasćowanje

Njedawno čitach w teksće serbskeje wučbnicy, zo je něchtó němski mišter w muchowaze. Chwilku přemyslowach. Zakładna forma słowa rěka potajkim muchowaha , a tuž wědźach, zo ma to něšto ze sportom činić. Muchowaha, němsce „Fliegengewicht“, je pomjenowanje, kotrež zwisuje mjez druhim z pjasćowanjom, kotrež je w medijach tuchwilu jara prezentne. Štož w serbšćinje tak něžnje klinči, je mjeno klasy, do kotrejež so sportowcy po waze ćěła zastopnjuja. Pomjenowani ćežkowaha a lochkowaha stej poměrnje derje znatej, tohorunja superćežka waha. W terminologiskej zběrce za předmjet sport njejsu mjenowane přikłady zapisane. Ale namakach je w dwuzwjazkowym słowniku. Tam jewja so tež dalše: bantamowa waha za němske „Bantamgewicht“ abo pjerowa waha resp. pjerkowa waha za němske „Federgewicht“. Eksistuje potajkim tójšto serbskich pomjenowanjow; a tuž so stajnje zaso wupłaći, raz do słownikow pohladać!

J. Šołćina

temy: serbske wotpowědniki za němske słowa

klučowe słowa: substantiw, terminologija

hesła: pjasćowanje, Boxen, Fliegengewicht, Supergewicht, Bantamgewicht, Federgewicht, waha (pjasćowanje)