Rěčne kućiki

Nakósna smužka 1

„www.mdr.de_křiwa-smužka-de_serbski-program“ – takle słyšach njedawno moderatora rańšeho programa skedźbnjeć na adresu poskitka serbskeho rozhłosa w interneće. Tutu adresu dyrbiš woprawdźe znać, dokelž na regularnych stronach MDR na serbski program ničo njepokazuje. Mje wšak zadźiwa wuraz křiwa smužka jako pomjenowanje interpunkciskeho znamješka, kotrež znajemy němsce jako „Schrägstrich“. To drje je njedorozumjenje: mjenowana smužka wšak nima być křiwa, a tež nic njeruna abo kwaklata, ale jedna so wo nakósnu smužku – tajka nakósna smužka wužiwa so při pisanju husto jako podaće alternatiwy, na přikład hdyž wupisa so dźěłowe městno za sobudźěłaćerja/sobudźěłaćerku. W internetowych adresach wotdźěluje wona hłowny dźěl adresy, na přikład www.mdr.de, wot podrjadowanych zapiskow, a z tym je z nowej technologiju nakósna smužka cyle nowu funkciju a wulke rozšěrjenje namakała.

S. Wölkowa

temy: serbske wotpowědniki za němske słowa

klučowe słowa: substantiw, interpunkcija

hesła: Schrägstrich, nakósna smužka, smužka