Nachhilfe

Tež w Budyšinje poskićuja wšelake towarstwa abo priwatnicy šulerjam přidatnu pomoc. Němsce prajimy k tomu „Nachhilfeunterricht“ resp. skrótka „Nachhilfe“. Kak móhli tomu serbsce prajić? W słowniku namakamy wjacore serbske wotpowědniki, mjenujcy pomoc, dopomoc, připomoc za „Nachhilfe“ resp. dopomocne hodźiny, připomocne hodźiny a pomocna wučba za „Nachhilfeunterricht“. Jednore substantiwy pomoc, dopomoc abo připomoc poćahuja so skerje powšitkownje na někajku přidatnu pomoc, tuž so jako serbski wotpowědnik za „Nachhilfeunterricht“ prawje njehodźa. Po digitalnym tekstowym korpusu hornjoserbšćiny so wurazaj dopomocne resp. připomocne hodźiny skerje njewužiwatej, ale pomocna, přidatna kaž tež spěchowanska wučba. A tute ekwiwalenty zdadźa so mi być najbóle zrozumliwe tež bjez konkretneho konteksta, wšak je jasnje, zo jedna so wo wučbu, kotraž měła šulerjam pomhać resp. jich spěchować. W tajkej pomocnej, přidatnej abo spěchowanskej wučbje, na přikład za matematiku, móža šulerjo intensiwnišo hač w šuli zwučować abo so na pruwowanja derje přihotować. A to je tola dobra wěc!

A. Pohončowa

Themen: Sorbische Entsprechungen für deutsche Wörter

Schlüsselwörter: Substantiv

Wörter: Nachhilfe, Nachhilfeunterricht, pomocna wučba, přidatna wučba, spěchowanska wučba