Nachhaltigkeit

Přeco zaso słyšimy wuraz „Nachhaltigkeit“ a wězo prašamy so, kak móžemy to serbsce prajić. Po leksikonje je „Nachhaltigkeit“ jednanski princip, při kotrymž steji w srjedźišću wobchowanje bytostnych kajkosćow, stabilnosće a přirodneje regeneraciskeje kmanosće někajkeho konkretneho systema, wosebje přirody, potajkim ekologiskeho systema. W tutym zwisku móžemy serbsce rěčeć wo trajnej, trajacej abo dlěšej skutkownosći, snadź tež prosće wo wuwaženosći. Ćešo pak je, prawy serbski adjektiw za němske „nachhaltig“ namakać. W zmysle „wirksam“ hodźa so bjezdwěla adjektiwy kaž sylny, skutkowny abo mócny. Hdyž pak dźe wo wobchowanje ekologiskeho systema, wužiwamy skerje trajny, trajacy abo wuwaženy. Za němske „nachhaltiges Wirtschaften“ mamy w serbšćinje wjacore móžnosće, wotpowědnik tworić, na přikład na trajnosć dźiwace hospodarjenje abo na dołhodobnosć dźiwace hospodarjenje, chiba wuwažene a resursy wobchowace hospodarjenje abo jednorje wuwažene hospodarjenje. Za kotry wotpowědnik so na kóncu rozsudźiće, lubi připosłucharjo, wotwisuje sylnje wot konkretneho konteksta.

A. Pohončowa

Themen: Sorbische Entsprechungen für deutsche Wörter

Schlüsselwörter: Substantiv, Adjektiv

Wörter: Nachhaltigkeit, nachhaltig