Mužny

Tež mužojo steja dźensniši dźeń w towaršnosći pod ćišćom. W telewizijnym kulturnym wusyłanju su rozprawjeli, skrótka zjate, wo dźensnišich narokach na, němsce prajene, „Männlichkeit“. Sym dyrbjała skrótka přemyslować, kak bych to serbsce prajiła. W słownikach podawa so wuraz muskosć abo mužnosć. Adjektiwaj, poćahowacej so na muži, stej muski a mužacy. Tak čisće rozdźělić so wonej njedatej, husto stej wobě móžnej, na přikład prajimy muski chór Delany, namakamy pak tež mužacy chór ansambla, mužacy abo muski hłós, mužacy abo muski woblek. Jenož, hdyž je něšto za muži abo wot mužow móžemy tež mužacy wužiwać, potajkim nimo muski woblek tež mužacy woblek, dokelž je to woblek za muži. Njebychmy pak prajili *mužaca wosoba, ale jenož muska wosoba. Ale, na druhej stronje prajimy jenož mužace forumy a nic *muske forumy, dokelž su to forumy za muži. A nimo toho mamy hišće němski adjektiw „mannhaft“. Tón přełožimy do serbšćiny jako mužny abo zmužity.

L. Šołćic

temy: serbske wotpowědniki za němske słowa, słowa podobne po woznamje abo formje

klučowe słowa: adjektiw, substantiw, wotwodźenka

hesła: mužny, muski, Männlichkeit, männlich, mužkosć, mužnosć, zmužity, mannhaft