Lěto 2020 a rěčne nowostki

Lěto 2020 přinjese nam tójšto nowych słowow, kiž su so dla rozšěrjenja koronawirusa a z tym nastawaceje koronapandemije wutworili, na čož su tež wuhotowarki rěčnych kućikow reagowali. Smy widźeli sćěhi hamstrowanja abo žurkowanja we wobchodach. W nalěću knježachu wobmjezowanja so swobodnje pohibować a tež tuchwilu postajeja lockdown a z nim zwisowace kontaktne wobmjezowanja naš wšědny dźeń. Smy so drje mjeztym na to zwučili nahubnik při nakupowanju a druhdźe nosyć. Někotři z nas dźěłaja husćišo wot doma, potajkim w homeofficu, druzy zaso sedźa doma w karantenje. Wuznajemy so mjeztym tež ze wšelakimi dawakami desinfekciskich srědkow a wažimy sej wosebje bjezkontaktne dawaki. Mjeztym tež w cyrkwjach našeje domizny husćišo wuhladamy bjezkontaktne krjepjeńčki. Nadźija je wulka, zo so cyła situacija w běhu přichodneho lěta polěpši; pomhać při tym měło nowe šćěpiwo. – Hladajo na napinace a napjate lěto 2020 přeju nam wšitkim měrniše lěto 2021, tohorunja z tójšto rěčnymi nowostkami, ale w přijomnišich kontekstach!

A. Pohončowa

temy: serbske wotpowědniki za němske słowa, słowotwórba

klučowe słowa: nowotwórba

hesła: koronawirus, koronapandemija, lockdown, nahubnik, bjezkontaktny, homeoffice, hamstrowanje, žurkowanje, karantena, kontaktne wobmjezowanje, šćěpiwo, lěto 2020