Rěčne kućiki

Knautschzone

Prěnje awta běchu tak konstruowane, zo so při zražce jenož mało wobškodźa. Dźensniše karoserije su porno tomu z wotpohladom „mjechke“ natwarjene. Na tute wašnje přeměnja so zražkowa energija do deformaciskeje energije. Pasažěrojo su přez to poměrnje derje škitani. Tutón škit docpěje so přez zatwarjenje deformaciskeje cony, kiž so mjenuje němsce tež „Knautschzone“. To su wěste techniske elementy – kaž na přikład metalowe žerdźe –, kiž přewozmu zražkowu energiju. Serbsce bych za „Knautschzone“ namjetowała deformaciska abo tołkanska cona. Wězo móžu zawk abo nowinu tołkać. Ale runje tak hodźi so tutón wuraz za wopisowany zjaw a myslu sej, zo jón kóždy rozumi. Přez tajke tołkanske cony, kiž maja awta prědku, zady a na boku, su wšak nětko w awće sedźacy derje škitani, ale pěškej, do kotrehož awto zrazy, tole wjele njepomha. Tohodla žadaja sej zakonjedawarjo wot awtoweje industrije, zo bychu wuwili wotpowědne tołkanske cony tež za pěškow, štož ma so technisce wězo hinak rozrisać. – Ale prjedy hač tak daloko budźe, přeju wšitkim pěškam přeprěčenje dróhow bjez zražkow a šoferam pola swojich wozydłow njestołkane tołkanske cony.

A. Pohončowa

temy: serbske wotpowědniki za němske słowa

klučowe słowa: substantiw

hesła: Knautschzone, tołkanska cona