Kartoffelsalat

Hdyž sym njedawno wo wšelakich běrnjacych jědźach rěčała a wam serbske wotpowědniki za nje předstajiła, njejsym na woblubowane kisałe běrny pokazała. Kisałe běrny respektiwnje kisałe neple su po cyłym serbskorěčnym teritoriju znata jědź, tež w delnjoserbšćinje praja kisałe kulki za němski „Kartoffelsalat“.

Serbski wuraz zda być hladajo na druhe słowjanske rěče wuwzaće. Naši słowjanscy susodźa tworja mjenujcy wotpowědniki za „Kartoffelsalat“ po samsnym mustrje kaž němčina, potajkim pólsce „sałatka ziemniaczana“, čěsće „bramborový salát“ a tež rusce „картофельный салат“. Bohužel słyšiš druhdy tež hižo w serbšćinje, zo praji so město kisałe běrny wuraz běrnjaca solotej. Motiwacija za serbske pomjenowanje kisałe běrny je skerje tajka, zo su naši prjedownicy – podobnje kaž je to z wašnjom w južnej Němskej abo Awstriskej – warjene běrny z kisałom začinili. Dźensa bjerjemy město toho zwjetša majonezu.

Grilowanska sezona je so hakle před krótkim tak prawje zahajiła a myslu sej, zo słodźa k praženym kołbaskam najlěpje kisałe běrny. Dajće sej je derje zesłodźeć!

A. Pohončowa

temy: serbske wotpowědniki za němske słowa, regionalne rozdźěle w serbšćinje

klučowe słowa: substantiw, dialekt

hesła: běrny, neple, kisałe neple, kisałe běrny, solotej, Kartoffelsalat