Kampfkunst

Znajeće wy, lubi připosłucharjo, serbski wuraz za němske „Kampfkunst“. Što to poprawom je? Wusko zwjazany z nim je tak mjenowany bojowy sport, němsce „Kampfsport“, na přikład kung fu, taekwondo, ale tež pjasćowanje, karate, judo, wjerhanje (němsce „Ringen”) a wjele druhich. Typiske za tute sportowe družiny je, zo wojuje so bjez třělbow. W bojowym sporće chcedźa wobdźělnicy dobyć, dyrbja pak so při tym po krutych prawidłach měć. Při tak mjenowanej „Kampfkunst“ dźe porno tomu w prěnim rjedźe wo sebješkit a zadźerženje w realnych konfliktnych situacijach, při čimž je wšitko dowolene. Němski wuraz je so wutworił po łaćonskim „Ars Martialis“ a njeměni ničo druhe hač kmanosć, zamóžnosć abo mojedla tež wuměłstwo romskeho boha wójny Marsa. Serbske słowo wuměłstwo – požčonka z čěšćiny – so po mojim měnjenju njewobmjezuje na estetiske tworjenje, ale móže so tohorunja poćahować na druhe kmanosće abo zamóžnosće čłowjeka. Tohodla mam serbske pomjenowanje bojowe wuměłstwo za kmany a hódny serbski wotpowědnik.

A. Pohončowa

temy: serbske wotpowědniki za němske słowa

klučowe słowa: substantiw, zestajenka

hesła: Kampfkunst, sport, bojowy sport, Ars Martialis, bojowe wuměłstwo