Gebrauchsanweisung

Jedyn abo druhi z was, lubi připosłucharjo, je snadź dóstał k hodam někajki techniski aparat darjeny. Kóždemu wužiwarjej so doporuči, zo njech sej do prěnjeho wužiwanja najprjedy jónu přečita gebrauchsanweisunku. Kak pak prajimy k tomu najlěpje serbsce? Němčina wužiwa nimo „Gebrauchsanweisung“ tež „Gebrauchsanleitung“ abo „Bedienungsanleitung“. Tuž móžemy serbsce prajić nawod k wužiwanju respektiwnje nawod k posłužowanju abo nawod za wužiwanje respektiwnje nawod za posłužowanje. Móžno je tež pokiwy k wužiwanju abo pokiwy k posłužowanju. Wot substantiwow wužiwanje respektiwnje posłužowanje hodźi so tež adjektiw wotwodźeć, tak nastanje serbski wotpowědnik wužiwanski nawod respektiwnje posłužowanski nawod. A štóž lubuje cuze słowa, móže serbski nawod wuměnić ze słowom instrukcija. Pola někotrych nastrojow hižo njedosaha łopjeno, na kotrymž je wšitko napisane, ale trjebaš k tomu knižku, a tu bychmy móhli pomjenować přiručka za wužiwanje respektiwnje přiručka za posłužowanje. – Nětko znajeće serbske wotpowědniki a móžeće je wužiwać. Hač wam tole pomha, tež tekst tajkeho wužiwanskeho nawoda rozumić a nastroj prawje wužiwać – to je zaso cyle druha wěc.

A. Pohončowa

Themen: Sorbische Entsprechungen für deutsche Wörter

Schlüsselwörter: Substantiv, Internationalismus

Wörter: Gebrauchsanweisung, Bedienungsanleitung, Gebrauchsanleitung