Bewegungsmelder

Mnozy ludźo maja doma připrawjenu wonkownu swěcu, kotraž so zaswěći, hdyž so něchtó bliži. Za to trjeba je wosebity „Bewegungsmelder“. To je nastroj, kiž wšitke pohiby we wěstym radiusu registruje a na to reaguje, w našim padźe potajkim swěcu zaswěći. Kak móžemy k tomu najlěpje serbsce prajić? W słowniku noweje leksiki smy namjetowali jako wotpowědnik pohibowy wozjewjak; snadź hodźa so tež wurazy wozjewjak/přizjewjak pohiba abo prosće pohibowy sensor. Znajemy dalše nastroje, kiž podobnje funguja, ale – hinak hač čini to pohibowy sensor – woprawdźe wěsty zjaw přizjewjeja, na přikład němsce „Rauchmelder“ abo „Feuermelder“. Prěni registruje kur w powětře, tamny reaguje na woheń. Wobaj nastrojej wubudźatej na to alarm, tohodla hodźi so wužiwać wuraz signalowa připrawa za kur, alarmowa připrawa za kur respektiwnje přizjewjak kura za němske „Rauchmelder“, a přizjewjak woh(e)nja abo tež woh(e)njowy přizjewjak za němske „Feuermelder“. Tajke wosebite techniske nastroje móža žiwjenje wuchować a w padźe pohiboweho sensora wopytarjej puć do domu wobswětlić.

A. Pohončowa

temy: serbske wotpowědniki za němske słowa

klučowe słowa: substantiw, wotwodźenka

hesła: Bewegungsmelder, wozjewjak, přizjewjak, Rauchmelder, Feuermelder