Berzdorfer See

Brunicowe jamy a po nich zawostawace jězory su nam we Łužicy bolostnje znata wěc. W srjedźnej Łužicy mamy samo turistisce wužiwanu Łužisku jězorinu – „Lausitzer Seenland“. Blisko Zhorjelca je dalši tajki jězor. Wón nasta jako naslědnik wuhloweje jamy pola Berzdorfa, kotruž su 1997 zawrěli a wot 2002 do 2013 z wodu pjelnili. Jězor ma swoje němske mjeno po něhdyšej jamje: „Berzdorfer See“. W serbskich medijach jewi so tute wočerstwjenišćo pod wjacorymi mjenami. Najhusćišo pisa so wo Bartonjanskim jězorje, rědšo wo Bartonoskim abo Bartonečanskim jězorje – wšitke tute mjena bazuja drje na serbskim wjesnym mjenje Bartono, kotrež je jako prěni zapisał Abraham Frencel jako wotpowědnik za Berthelsdorf, tež w Pfuhlowym słowniku mjeno namakamy – w žanym padźe pak z jasnym poćahom na wjes „Berzdorf auf dem Eigen“, wo kotruž pola našeho jězora dźe. Serbska mjenowa tradicija za nju njewobsteji, kaž pokazuje to mjez druhim pohlad do mjenowych knihow Waltera Wenzela. Tohodla měło so po mojim měnjenju radšo rěčeć wo Berzdorfje a wo Berzdorfskim jězorje, kotryž wabi w lěću ke kupanju, wudźenju a płachtakowanju.

S. Wölkowa

temy: serbske wotpowědniki za němske słowa

klučowe słowa: mjeno, substantiw

hesła: Berzdorfer See, Berzdorf, Berzdorfski jězor, Bartono, Bartonoski jězor, Bartonečanski jězor, jězor