Aktyničak a rozdźěłowak

Hižo njetrěbne podłožki z wosobinskimi datami měli najradšo roztorhać abo rozdrěć, a to z pomocu wosebiteho aparata, kotryž mjenujemy němsce „Aktenvernichter“. Z pomocu tajkeho aparata nastawaja ćeńke papjerjane šlebjerdki. Tajki aparat bychmy po přikładźe němčiny pomjenować móhli aktowy ničak, po mustrje prochsrěbak pak tež aktyničak. Při tym myslu na dalši, podobny aparat, kotryž mjenuje so němsce „Reißwolf“. Tajki „Reißwolf“ zamóže nimo papy a papjery tež dalše maćizny skóncować, na přikład tekstilije. A poprawom tež naš domjacy aktyničak jenož papjeru njerozdźěłuje, ale tohorunja digitalne medije kaž CDje abo DVDje skóncuje. Za němske słowo „Reißwolf“ doporuči dwuzwjazkowy němsko-hornjoserbski słownik serbski wotpowědnik rozdrěwak. Přehladuješ hornjoserbske teksty zašłych lět a prašeš so druhich ludźi, maš pak zaćišć, zo so tuta serbska wotwodźenka přesadźiła njeje. Mamy potajkim lěpše rozrisanje? Wězo steja nam dalše serbske werby k dispoziciji, wot kotrychž móhli wotwodźenki tworić. Tuž móhli nimo namjetowaneho aktyničaka tworić wotwodźenki kaž roztorhowak abo rozdźěłowak.

A. Pohončowa

Themen: Sorbische Entsprechungen für deutsche Wörter

Schlüsselwörter: Ableitung, Substantiv

Wörter: aktyničak, rozdźěłowak, Reißwolf, roztorhowak, Aktenvernichter, aktowy ničak