Rěčne kućiki

Schönheitswahn und Schlankheitswahn

Posledni króć sym wam, lubi připosłucharjo, něšto wo kurach za šwižnosć resp. za wotbywanje powědała. Wobhladamy-li sej časopisy, da so hižo młodostnym ideal wo šwižnym a rjanym čłowjeku sugeruje. A prominentni a ći, kotřiž chcedźa to rady być, maja problemy z přirodnym zestarjenjom a boja so po zdaću fałdow w mjezwoču bóle hač wulkeje wody. Hižo w nas wobdawacym wobswěće maš lute beauty-oazy a tež w telewiziji móžeš sćěhować někajkim beauty-operacijam zdźěla hižo młodostnych.

Kak pak serbsce tute přehnate wuwiće pomjenować, kotrež němsce z „Schönheitswahn“ abo tež „Schlankheitswahn“ charakterizujemy? W słowniku namakamy jenož słowo błud, štož je pomjenowanje chorosće. Za njerozumne počinanja jewja so atributy kaž kołwrótny, wólberny, cybnjeny a dalše. Tajke žedźenje za rjanosću a šwižnosću bych tohodla tež pomjenowała jako druhdy přehnatu žadosć/žadosćiwosć abo tež žedźbu za rjanosću a šwižnosću.

J. Šołćina

temy: serbske wotpowědniki za němske słowa

klučowe słowa: substantiw

hesła: Schönheitswahn, Schlankheitswahn