Jedyn abo pjeć
„Je to jedyn abo pjeć hodźin puća“ – tajku formulaciju kritizowaše njedawno w Rozhledźe młody recensent hornjoserbskeho přełožka Tolkienoweho Hobita jako wopačnu a dospołnje njezrozumliwu. Tola wón so myli. Konstrukcija jedyn abo w kombinaciji z někajkim ličbnikom njeje w staršej serbšćinje ničo njewšědne a je tež derje w słownikach wobswědčena. Wona pokazuje na přibližnu hódnotu a woznamjenja to, štož dźensa zwuraznjamy z pronomenomaj někak abo něhdźe abo z prepoziciju wokoło. Jedyn abo pjeć hodźin – to je neutralnje prajene někak pjeć hodźin, w kusk oficialnišim stilu abo matematisce zwuraznjene něhdźe pjeć hodźin a we wobchadnej rěči wokoło pjeć hodźin. Jedyn abo pjeć hodźin klinči porno tomu trochu archaisce, a to so k rěči Hobita poprawom derje hodźi. Zajimawe je, zo je tute wašnje wopisowanja přibližneje hódnoty tež w delnjoserbšćinje znate. Tam je so samo wutworiło hromadu sćehnjene słowo „jadnab“, štož njeje ničo druhe hač jaden abo a namaka so tež w internetnym słowniku.
S. Wölkowa
temy: gramatika, słowa podobne po woznamje abo formje
klučowe słowa: numeral, wobrot, delnjoserbšćina